માઇનસ 60 ડિગ્રી તાપમાનમાં પણ જીવતો રહે છે આ ઉંદર, વૈજ્ઞાનિકોએ શોધ્યા સુપરહીરો જેવા પાવર્સ

Andean Mouse Discovery | પહેલી નજરે જોતાં આ તમને એક સામાન્ય ઉંદર જેવો જ લાગશે, પરંતુ તેના વિશે જાણીને તમે પણ દંગ રહી જશો. પ્રકૃતિના એક અદભુત કરિશ્મા સમાન આ જીવનું નામ ‘એન્ડિયન લીફ-ઇયર માઉસ’ (Andean Leaf-Eared Mouse) છે.

આ નાનકડો ઉંદર પૃથ્વી પર સૌથી વધુ ઊંચાઈ પર રહેતો સસ્તન (Mammal) જીવ છે. આપણી હથેળીમાં સમાઈ જતો આ ઉંદર એન્ડીઝ પર્વતમાળામાં 6,700 મીટરથી વધુની ઊંચાઈ પર રહે છે, જ્યાં તાપમાન માઇનસ 60 ડિગ્રી સુધી પહોંચી જાય છે. તાજેતરમાં થયેલા એક નવા સંશોધનમાં આ ઉંદરના નામે કેટલાય વિશ્વ રેકોર્ડ (World Records) નોંધાયા છે.

યુનિવર્સિટી ઓફ મોન્ટાના (University of Montana) ના બાયોલોજી રિસર્ચર (Biology Researcher) જેકરી ચેવિરોનનું આ સંશોધન પ્રતિષ્ઠિત જર્નલ ‘સાયન્સ’ (Science) માં પ્રકાશિત થયું છે. તેમણે જણાવ્યું કે, આ ઉંદર એવા વિસ્તારોમાં સરળતાથી રહી શકે છે જ્યાં સંપૂર્ણ ટ્રેનિંગ પામેલા પર્વતારોહકો (Mountaineers) પણ માંડ થોડો સમય વિતાવી શકે છે.

આ ઉંદરની પ્રજાતિ હિમાલયન પિકા (Himalayan Pika) ના રહેણાંક વિસ્તાર કરતાં પણ સેંકડો મીટર ઉપર જોવા મળી છે. પિકા પાસે પહેલા આ રેકોર્ડ હતો. આ ઉંદરની વિશેષતા એ છે કે તે ચિલી (Chile) ના પર્વતોની સૌથી ઊંચી ચોટી પર પણ જીવી શકે છે અને સમુદ્રની સપાટી (Sea Level) પર પણ જોવા મળે છે. પૃથ્વી પરના કોઈપણ સસ્તન જીવની તુલનામાં આ ઉંદરનો રહેવાનો વ્યાપ સૌથી મોટો છે.

વૈજ્ઞાનિકોના મતે, આ ઉંદર પોતાની જબરદસ્ત સહનશક્તિ અને અનુકૂલન ક્ષમતા (Adaptability) ના કારણે આ કરી શકે છે.

આ સ્ટડી (Study) દર્શાવે છે કે ઊંચાઈ પર અને મેદાન પ્રદેશમાં રહેતા આ બંને ઉંદરો જિનેટિક (Genetic) રીતે એક સમાન છે. આ સંશોધન ભવિષ્યમાં માનવ તબીબી વિજ્ઞાન (Human Medicine) ના ક્ષેત્રમાં પણ અત્યંત મહત્વની માહિતી અને નવી દિશા પૂરી પાડી શકે છે.