ભારે વરસાદને પગલે પુણે-મુંબઈ એક્સપ્રેસ-વે અને જૂનો હાઈવે બંધ

પુણે-મુંબઈ એક્સપ્રેસ-વે અને જૂના પુણે-મુંબઈ હાઈવે બંને પર વાહનવ્યવહાર સંપૂર્ણપણે બંધ

મુંબઈ એક્સપ્રેસ-વે અને જૂનો હાઈવે બંધમુંબઈ/પુણે: ભારે વરસાદ, પૂર અને ભૂસ્ખલન (લેન્ડસ્લાઇડ)ના કારણે સોમવારે પુણે-મુંબઈ એક્સપ્રેસ-વે અને જૂના પુણે-મુંબઈ હાઈવે બંને પર વાહનવ્યવહાર સંપૂર્ણપણે બંધ કરી દેવામાં આવ્યો છે, તેમ પોલીસે જણાવ્યું હતું.

સુરક્ષાની ચિંતાઓને ધ્યાનમાં રાખીને સત્તાધીશોએ નાગરિકોને આગામી આદેશ ન મળે ત્યાં સુધી પુણે અને મુંબઈ વચ્ચે મુસાફરી ન કરવાની અપીલ કરી છે.

પોલીસે એક જાહેર એડવાઈઝરી (ચેતવણી) જારી કરીને જણાવ્યું છે કે, પુણે-મુંબઈ એક્સપ્રેસ-વે અને જૂના હાઈવે પર બંને તરફનો વાહનવ્યવહાર આગામી સૂચના સુધી રોકી દેવામાં આવ્યો છે. એડવાઈઝરીમાં જણાવાયું છે કે, “નાગરિકોને વિનંતી છે કે જ્યાં સુધી આગળની સૂચનાઓ જારી ન થાય ત્યાં સુધી પુણે અને મુંબઈ વચ્ચે કોઈ મુસાફરી ન કરે. જેઓ મુસાફરીનું આયોજન કરી રહ્યા છે તેઓને તેમની મુસાફરી મોકૂફ રાખવા અને સરકારી એજન્સીઓ દ્વારા જારી કરવામાં આવતી ટ્રાફિક ગાઈડલાઈન્સ અને અપડેટ્સનું પાલન કરવા સલાહ આપવામાં આવે છે.”

પોલીસના જણાવ્યા અનુસાર, માવલ અને તામ્હિણી ઘાટના કેટલાક ભાગોમાં પૂર જેવી સ્થિતિ સર્જાઈ છે, જેના કારણે પુણે અને મુંબઈને જોડતા વૈકલ્પિક માર્ગો પણ પ્રભાવિત થયા છે. પુણે-મુંબઈ એક્સપ્રેસ-વે પર કનેક્ટિંગ લિંક અને મિસિંગ લિંક સેક્શન વચ્ચે એક કોંક્રિટનો પિલર રોડ પર પડી જતાં આ હાઈવે બંધ કરવો પડ્યો છે. આ સિવાય, જૂનો પુણે-મુંબઈ હાઈવે પણ અનેક સ્થળોએ પાણી ભરાઈ જવાના કારણે બંધ કરી દેવાયો છે.

અધિકારીઓએ ઉમેર્યું કે, લોહગઢ કિલ્લા નજીક પાટણ ગામમાં ભૂસ્ખલન થયું છે, જ્યાં એક પરિવાર ફસાયો હોવાના અહેવાલ છે. આ વિસ્તારમાં તાત્કાલિક બચાવ કામગીરી (રેસ્ક્યુ ઓપરેશન) શરૂ કરી દેવામાં આવી છે. ભારે વરસાદને જોતા પુણે જિલ્લા વહીવટીતંત્રે તમામ શાળાઓમાં રજા જાહેર કરી દીધી છે.

અધિકારીઓના જણાવ્યા મુજબ, ભારે વરસાદ વચ્ચે ટનલ ૨ ના એક્ઝિટ (બહાર નીકળવાના રસ્તા) નજીક ભૂસ્ખલન થતાં સોમવારે વહેલી સવારે ખોપોલી-કુસગાંવ ‘મિસિંગ લિંક’ એલાઈનમેન્ટના પુણેથી મુંબઈ તરફ જતા માર્ગ પર વાહનોને ડાયવર્ટ કરવામાં આવ્યા હતા.

નોંધનીય છે કે, બે મહિના પહેલા જ શરૂ કરાયેલી ૧૩ કિલોમીટર લાંબી આ મુંબઈ-પુણે એક્સપ્રેસ-વે મિસિંગ લિંક સહ્યાદ્રી પર્વતોની વચ્ચેથી પસાર થાય છે, જે મુસાફરીનું અંતર ૬ કિલોમીટર જેટલું ઘટાડે છે અને સમયમાં ૨૫ થી ૩૦ મિનિટની બચત કરે છે.

મહારાષ્ટ્ર સ્ટેટ રોડ ડેવલપમેન્ટ કોર્પોરેશન (MSRDC) એ જણાવ્યું હતું કે, વાહનચાલકોની સુરક્ષા સુનિશ્ચિત કરવા માટે સોમવારે સવારે ૪ વાગ્યાથી સાવચેતીના ભાગરૂપે ટ્રાફિક ડાયવર્ઝન અમલમાં મૂકવામાં આવ્યું છે.