અમેરિકામાં પત્ની સહિત 4ની હત્યાના આરોપી વિજય કુમારે કોર્ટમાં કહ્યું- ‘મેં આત્મરક્ષણમાં ગોળી ચલાવી’

Vijay Kumar Case | ગ્વિનેટ કાઉન્ટી સુપિરિયર કોર્ટમાં સોમવારે યોજાયેલી બોન્ડ સુનાવણી (Bond Hearing) દરમિયાન, વિજય કુમારે પોતાની પત્ની અને પરિવારના અન્ય 3 સભ્યોની ગોળી મારીને હત્યા કરવાના કેસમાં પોતાને નિર્દોષ જાહેર કર્યા છે અને દાવો કર્યો છે કે તેમણે આત્મરક્ષણ (Self-Defense)માં આ પગલું ભર્યું હતું. આ કેસમાં પ્રોસિક્યુશન દ્વારા મૃત્યુદંડ (Death Penalty)ની માંગ કરવામાં આવી છે.

આ સુનાવણીથી આગામી ટ્રાયલ દરમિયાન બંને પક્ષો વચ્ચે કેવા પ્રકારની દલીલો થશે તેનો સ્પષ્ટ સંકેત મળી ગયો છે. વિજય કુમાર વતી જાણીતા ડિફેન્સ એટર્ની એશલી મર્ચન્ટ (Ashleigh Merchant) કોર્ટમાં હાજર રહ્યા હતા. જ્યારે જજે પૂછ્યું કે તેમના અસીલ ગુનો સ્વીકારે છે કે નહીં, ત્યારે મર્ચન્ટે કહ્યું, “તેઓ દોષિત નથી.” મર્ચન્ટે દલીલ કરી હતી કે આ સામૂહિક હત્યાકાંડ નથી, પરંતુ આત્મરક્ષણ માટે લેવાયેલું એક આખરી પગલું હતું.

ઘટનાની વિગતો: વિજય કુમાર પર 23 જાન્યુઆરીના રોજ ગ્વિનેટ કાઉન્ટીના એક મકાનમાં તેમની 43 વર્ષીય પત્ની મીનુ ડોગરા, 33 વર્ષીય ગૌરવ કુમાર, 37 વર્ષીય નિધિ ચાંદેર અને 38 વર્ષીય હરીશ ચાંદેરની હત્યા કરવાનો આરોપ છે. માર્ચ મહિનામાં સરકારી વકીલોએ જાહેરાત કરી હતી કે તેઓ આ કેસમાં ફાંસીની સજાની માંગ કરશે.

બચાવ પક્ષ (Defense)ની દલીલો:

• વિજય કુમારને તેમની પત્નીના પરિવારના કેટલાક સભ્યો દ્વારા લાંબા સમયથી ધમકીઓ, બળજબરીથી પૈસા વસૂલવા (Extortion) અને હિંસાનો શિકાર બનાવવામાં આવી રહ્યા હતા.

• ઘટનાની રાત્રે કુમારને તેમના ફોન કે કોટ વગર જબરદસ્તીથી ચાંદેરના ઘરે લઈ જવામાં આવ્યા હતા, જ્યાં તેમને પોતાના જીવનું જોખમ હતું.

• કુમારની સગીર પુત્રીએ અગાઉ આપેલા નિવેદનને પાછું ખેંચ્યું છે, જે દર્શાવે છે કે કુમારે ખરેખર ડરના માર્યા આ પગલું ભર્યું હતું.

• વિજય કુમારનો કોઈ ગુનાહિત ઈતિહાસ નથી અને તેઓ જ્યોર્જિયાના એમ્યુઝમેન્ટ મશીન ઉદ્યોગમાં જાણીતું નામ છે. તેમના સમર્થનમાં 100થી વધુ પત્રો કોર્ટમાં રજૂ કરાયા છે.

સરકારી પક્ષ (Prosecution)ની દલીલો: બીજી તરફ, આસિસ્ટન્ટ ડિસ્ટ્રિક્ટ એટર્ની ડોન ગીરી (Don Geary) એ આ દલીલોને નકારી કાઢી છે. સરકારી પક્ષના જણાવ્યા અનુસાર, પુરાવાઓ દર્શાવે છે કે કુમારને ઘરમાં જવાની ફરજ પાડવામાં આવી નહોતી. તેમની 12 વર્ષની પુત્રીએ આ ઘટના નજરે જોઈ હતી અને 911 પર કોલ કર્યો હતો.

હાલમાં વિજય કુમાર જેલમાં જ રહેશે. હવે આગામી ટ્રાયલમાં એ જોવાનું રહેશે કે જ્યુરી આને આત્મરક્ષણ માને છે કે પૂર્વઆયોજિત સામૂહિક હત્યાકાંડ.