અમેરિકામાં ભારતીય વિદ્યાર્થીઓના વિઝામાં 62 ટકાનો જંગી ઘટાડો, ચીનને 34 ટકાનો ફટકો

US Student Visa | અમેરિકા (USA) માં શિક્ષણ મેળવવા અને અભ્યાસ બાદ ત્યાં જ કારકિર્દી બનાવવાનું સપનું જોતા ભારતીય વિદ્યાર્થીઓ માટે ચિંતાજનક સમાચાર સામે આવ્યા છે.

અમેરિકન થિંક ટેન્ક સેન્ટર ફોર ઇમિગ્રેશન સ્ટડીઝ (CIS) ના નવા રિપોર્ટ અનુસાર, વર્ષ 2025 ના પીક એડમિશન સીઝન (May થી August) દરમિયાન ભારતીય નાગરિકોને આપવામાં આવતા F-1 Student Visas ની સંખ્યામાં 62% નો જંગી ઘટાડો નોંધાયો છે.

રિપોર્ટના આંકડા અનુસાર, 2024 ના મે થી ઓગસ્ટ વચ્ચે ભારતીય વિદ્યાર્થીઓને 58,694 વિઝા આપવામાં આવ્યા હતા, જે 2025 માં ઘટીને માત્ર 22,149 રહી ગયા છે.

આ જ ગાળામાં ચીની (Chinese) વિદ્યાર્થીઓને અપાતા વિઝામાં પણ 34% નો ઘટાડો થયો છે (61,075 થી ઘટીને 40,034). એટલે કે ચીન કરતા ભારતીય વિદ્યાર્થીઓના વિઝા રદ્દ થવાનો દર લગભગ બમણો રહ્યો છે.

OPT પ્રોગ્રામ બંધ કરવાની ભલામણ આ ઘટાડા ઉપરાંત, CIS ના સીનિયર લીગલ ફેલો જોર્જ ફિશમેન (George Fishman) દ્વારા તૈયાર કરાયેલા અહેવાલમાં ઓપ્શનલ પ્રેક્ટિકલ ટ્રેનિંગ (OPT) પ્રોગ્રામને સંપૂર્ણપણે નાબૂદ કરવાની ભલામણ કરવામાં આવી છે.

OPT એ F-1 વિઝા પર રહેલા આંતરરાષ્ટ્રીય વિદ્યાર્થીઓને ડિગ્રી પૂરી કર્યા પછી 12 થી 36 મહિના સુધી અમેરિકામાં કામ કરવાની મંજૂરી આપતી યોજના છે.

અહેવાલમાં દાવો કરવામાં આવ્યો છે કે OPT પ્રોગ્રામ અમેરિકન નાગરિકોની નોકરીઓ અને વેતનને નુકસાન પહોંચાડે છે. ડેટા દર્શાવે છે કે વર્ષ 2024-25 ના શૈક્ષણિક વર્ષ દરમિયાન OPT હેઠળ કામ કરતા કુલ 2,94,253 વિદેશી ગ્રેજ્યુએટ્સમાંથી લગભગ 49% (1,43,740) એકલા ભારતીય નાગરિકો હતા. ખાસ કરીને STEM (Science, Technology, Engineering, and Mathematics) ક્ષેત્રે OPT નો ઉપયોગ કરતા વિદ્યાર્થીઓમાં ભારતીયોનો હિસ્સો સૌથી વધુ છે.

ભારતીય વિદ્યાર્થીઓ પર અસર ઇન્સ્ટિટ્યૂટ ઓફ ઇન્ટરનેશનલ એજ્યુકેશન (IIE) અનુસાર, અમેરિકામાં કુલ 11.77 લાખ આંતરરાષ્ટ્રીય વિદ્યાર્થીઓમાંથી 3.63 લાખથી વધુ ભારતીયો છે, જે સૌથી મોટી સંખ્યા છે. જો ટ્રમ્પ પ્રશાસન દ્વારા OPT ને રદ કરવાનો કે તેના પર વધુ ટેક્સ/ફી લાદવાનો નિર્ણય લેવામાં આવશે, તો વિદેશમાં ઉચ્ચ શિક્ષણ મેળવ્યા બાદ અનુભવ અને H-1B Visa મેળવવાનો ભારતીયોનો માર્ગ અત્યંત મુશ્કેલ બની જશે.