અમેરિકામાં કચરાની ગાડીમાંથી મળેલી નવજાત બાળકીના કેસમાં માતા અનુરાધા મનુકોંડાને 90 દિવસની જેલ

અમેરિકાના ઓહાયો રાજ્યમાં 3 વર્ષ પહેલાં કચરાની ગાડીમાંથી નવજાત બાળકીનો મૃતદેહ મળી આવ્યો હોવાના ચકચારી કેસમાં 27 વર્ષીય અનુરાધા મનુકોંડાને 90 દિવસની જેલની સજા ફટકારવામાં આવી છે.

આ ઉપરાંત તેને 5 વર્ષ સુધી કોર્ટની દેખરેખ હેઠળ રહેવાનો આદેશ આપવામાં આવ્યો છે. બાળકીના મૃતદેહ સાથે ગંભીર દુર્વ્યવહાર કરવાના ગુનામાં દોષ કબૂલ કર્યા બાદ 6 નવેમ્બરના રોજ મેડિસન કાઉન્ટી કોમન પ્લીઝ કોર્ટમાં આ સજા સંભળાવવામાં આવી હતી.

આ સમગ્ર ઘટનાની શરૂઆત 16 જૂન, 2023ના રોજ થઈ હતી. ઓહાયોના કોલંબસ શહેરની ઉત્તર-પશ્ચિમમાં આવેલા પ્લેન સિટી વિસ્તારમાં બ્લુસ્ટેમ લેન પર કચરાની ગાડીમાંથી નવજાત બાળકીનો મૃતદેહ મળી આવ્યો હતો. આ ઘટનાથી સ્થાનિક સમુદાયમાં ભારે આઘાત ફેલાયો હતો.

‘ધ કોલંબસ ડિસ્પેચ’ના અહેવાલ મુજબ, અનુરાધાના વકીલ સંજય કે. ભટ્ટે કોર્ટમાં રજૂઆત કરી હતી કે તેમની અસીલને પોતાની ગર્ભાવસ્થા અંગે જાણ નહોતી. તેઓ પ્લેન સિટીમાં સંબંધીઓને મળવા ગયાં હતાં ત્યારે અચાનક પ્રસૂતિ થઈ હતી. બચાવ પક્ષે દાવો કર્યો હતો કે બાળકી મૃત અવસ્થામાં જન્મી હતી.

વકીલના જણાવ્યા અનુસાર, અનુરાધાને એવી તબીબી સમસ્યા હતી જેના કારણે માસિક ચક્ર અનિયમિત રહેતું હતું. અગાઉ કરાવેલી ગર્ભાવસ્થા તપાસમાં પણ પરિણામ નેગેટિવ આવ્યું હતું.

અચાનક પ્રસૂતિ થતાં તેઓ ગભરાઈ ગયાં હતાં અને નવજાત બાળકીના મૃતદેહને પ્લાસ્ટિકની થેલીમાં વીંટાળીને કચરામાં નાખી દીધો હતો.

જોકે, આ તમામ દલીલો બચાવ પક્ષ દ્વારા રજૂ કરવામાં આવી હતી અને તેની સ્વતંત્ર પુષ્ટિ થઈ નથી. તપાસ અધિકારીઓ પણ બાળકી જીવિત જન્મી હતી કે મૃત જન્મી હતી તે નક્કી કરી શક્યા નહોતા.

બાળકીની ઓળખ થઈ ન હોવાથી સ્થાનિક લોકોએ તેને ‘મેડિસન બેબી ડો’ નામ આપ્યું હતું. તેના અંતિમ સંસ્કારમાં 100થી વધુ લોકો જોડાયા હતા.

સ્થાનિક વેપારીઓ અને નાગરિકોએ અંતિમવિધિ તથા દફનવિધિનો ખર્ચ ઉઠાવવામાં સહયોગ આપ્યો હતો. બાળકીની કબર માટે સ્મૃતિશિલા પણ દાનમાં આપવામાં આવી હતી.

આ કેસની તપાસમાં ફોરેન્સિક પરીક્ષણ અને ડીએનએ વિશ્લેષણનો સહારો લેવામાં આવ્યો હતો.

તપાસકર્તાઓએ કચરામાંથી મળેલી વસ્તુઓ, જેમાં ક્યૂ-ટિપ અને બીયરની બોટલનો પણ સમાવેશ થતો હતો, તેમાંથી ડીએનએ પુરાવા મેળવ્યા હતા. આ પુરાવાના આધારે તપાસ પ્લેન સિટીના બ્લુસ્ટેમ લેન ખાતેના એક રહેણાંક મકાન સુધી પહોંચી હતી.

ઓહાયો બ્યુરો ઓફ ક્રિમિનલ ઇન્વેસ્ટિગેશને પણ તપાસમાં મદદ કરી હતી. આખરે અનુરાધા મનુકોંડાની બાળકીની જૈવિક માતા તરીકે ઓળખ કરવામાં આવી હતી.

ઘટના સમયે તેમની ઉંમર 24 વર્ષ હતી અને તેઓ ફેરબોર્ન વિસ્તારમાં રહેતાં હતાં. તેઓ પ્લેન સિટી કે મેડિસન કાઉન્ટીમાં રહેતાં કે કામ કરતાં નહોતાં.

તપાસમાં જાણવા મળ્યું હતું કે બાળકીના મૃતદેહ પર અનેક ફ્રેક્ચર અને ઈજાઓ હતી. જોકે, કચરાની ગાડીના કમ્પેક્ટરથી મૃતદેહને ભારે નુકસાન થયું હોવાથી આ ઈજાઓ મૃત્યુ પહેલાં થઈ હતી કે પછી તે નક્કી થઈ શક્યું નહોતું. મેડિકલ તપાસ અધિકારી પણ મૃત્યુનું ચોક્કસ કારણ જાણી શક્યા નહોતા.

એપ્રિલ 2025માં પ્લેન સિટીના પોલીસ વડા ડેલ મેકીએ જણાવ્યું હતું કે બાળકી કચરામાં મૂકાઈ ત્યારે જીવિત હતી તે સાબિત કરતો કોઈ પુરાવો તપાસકર્તાઓ પાસે નહોતો.

બીજી તરફ, બાળકી મૃત જન્મી હતી તે પણ સાબિત થઈ શક્યું નહોતું. પુરાવાના અભાવે હત્યાનો ગુનો દાખલ કરવો શક્ય બન્યો નહોતો.

અનુરાધાએ ઓગસ્ટ 2026માં મૃતદેહ સાથે ગંભીર દુર્વ્યવહારના આરોપનો ગુનો કબૂલ કર્યો હતો. ઓહાયો રાજ્યના કાયદા હેઠળ આ પાંચમા દરજ્જાનો ગુનો છે.

6 નવેમ્બરે ન્યાયાધીશ ઈમોન પી. કોસ્ટેલોએ તેમને ટ્રાઇ-કાઉન્ટી રિજનલ જેલમાં 90 દિવસની કેદ અને 5 વર્ષ સુધી કોર્ટની દેખરેખ હેઠળ રહેવાની સજા ફટકારી હતી.

સજા બાદ પોલીસે જણાવ્યું હતું કે બાળકીનો મૃતદેહ મળ્યો ત્યારથી સજા સંભળાવવામાં આવી ત્યાં સુધી 1,240 દિવસ વીતી ગયા હતા.

પોલીસ વિભાગે કહ્યું કે આ ઘટનાથી સમુદાયને ભારે આઘાત લાગ્યો હતો અને વિસ્તૃત તપાસ બાદ હવે લોકોને થોડી રાહત મળી છે. સાથે જ પોલીસે ‘મેડિસન બેબી ડો’ને ક્યારેય નહીં ભૂલવાની લાગણી પણ વ્યક્ત કરી હતી.