ગ્રીન કાર્ડના નવા નિયમથી યુએસમાં ડોક્ટરો અને વૈજ્ઞાનિકો ઓછા થઈ જશે

ટ્રમ્પ પ્રશાસન (Trump Administration) ની નવી નીતિ, જે મુજબ ગ્રીન કાર્ડ (Green Card) મેળવવા ઈચ્છુકોએ હવે પોતાના વતન (Home Country) પરત જઈને અરજી કરવી પડશે, તેના કારણે યુએસ (US) ના આઈટી સેક્ટર (IT Sector) માં ભારે આક્રોશ ફાટી નીકળ્યો છે.

લિંક્ડઇન (LinkedIn) અને કોર્સિરા (Coursera) જેવી વૈશ્વિક ટેકનોલોજી કંપનીઓના સ્થાપકોએ આ પગલાની આકરી ટીકા કરી છે અને તેને સમગ્ર અમેરિકા માટે નુકસાનકારક ગણાવ્યું છે.

ટેક લીડર્સે ઉઠાવ્યા ગંભીર સવાલો

લિંક્ડઇનના સહ-સ્થાપક રીડ હોફમેન (Reid Hoffman) એ આ નિર્ણય પર સવાલ ઉઠાવતા સોશિયલ મીડિયા પર લખ્યું કે, “શું આનો અર્થ એ છે કે આર્ટિફિશિયલ ઇન્ટેલિજન્સ (AI) ના સંશોધકો, કર્મચારીઓ અને વિદ્યાર્થીઓએ હવે દેશ છોડવો પડશે અને પોતાનું કામ ચાલુ રાખવા માટે લાંબી પ્રક્રિયા (Backlog Process) ની રાહ જોવી પડશે?” તેમણે ઉમેર્યું કે આ પગલું ટેકનોલોજી, વ્યવસાય અને વ્યાપકપણે અમેરિકા માટે નુકસાનકારક (Harmful) સાબિત થશે.

બીજી તરફ, કોર્સિરાના સહ-સ્થાપક એન્ડ્રુ એનજી (Andrew Ng) એ જણાવ્યું કે ગ્રીન કાર્ડ અરજદારોને તેમના દેશમાંથી અરજી કરવાનું કહેવું એ કાયદેસરના ઇમિગ્રેશન (Legal Immigration) પર એક મનસ્વી હુમલો છે.

આ નિર્ણયથી અસંખ્ય પરિવારો પ્રભાવિત થશે અને દેશમાં ડોક્ટરો, શિક્ષકો અને વૈજ્ઞાનિકોની અછત સર્જાશે, જેના કારણે AI ક્ષેત્રમાં અમેરિકાની સ્પર્ધાત્મકતા (Competitiveness) જોખમાશે. ટેક સ્ટાર્ટઅપ વાય કોમ્બિનેટર (Y Combinator) ના ફાઉન્ડર ગેરી ટેન (Garry Tan) એ પણ આ નીતિને ભ્રમિત અને ખરાબ ગણાવી છે.

સરકાર અને USCIS નો પક્ષ

જોકે, યુએસ સિટિઝનશિપ એન્ડ ઇમિગ્રેશન સર્વિસીસ (USCIS) ના પ્રવક્તા ઝેક કેહલર (Zach Kahler) એ સ્પષ્ટ કર્યું છે કે વિદ્યાર્થીઓ અને અસ્થાયી કામદારો ટૂંકા ગાળા માટે દેશમાં આવે છે અને તેમની આ મુલાકાત ગ્રીન કાર્ડ પ્રક્રિયાના 1 લા પગલા તરીકે ઉપયોગમાં ન લેવાવી જોઈએ. આ નીતિથી લૂપહોલ્સ (Loopholes) બંધ થશે અને વિઝા નકારાયા પછી ગેરકાયદેસર રીતે રહેતા લોકોને અટકાવી શકાશે. હવે માત્ર અસાધારણ સંજોગોમાં જ યુએસની અંદરથી ગ્રીન કાર્ડ આપવામાં આવશે.