વિશ્વને મોટી રાહત: અમેરિકા અને ઈરાન વચ્ચે 2 અઠવાડિયાના સીઝફાયરની જાહેરાત

વિશ્વ જેની આતુરતાથી રાહ જોતું હતું તેવા સમાચાર અમેરિકાના પ્રમુખ ડોનાલ્ડ ટ્રમ્પે (Donald Trump) આપ્યા છે. પોતાની કડક ડેડલાઇન પૂર્ણ થવાની ગણતરીની મિનિટો પહેલા જ ટ્રમ્પે સોશિયલ મીડિયા પ્લેટફોર્મ ‘ટ્રુથ સોશિયલ’ (Truth Social) પર જાહેરાત કરી છે કે તેઓ ઈરાન (Iran) પરના હુમલાને બે અઠવાડિયા માટે સ્થગિત કરવા સંમત થયા છે. આ નિર્ણયને પશ્ચિમ એશિયામાં વ્યાપક યુદ્ધવિરામ (Ceasefire) તરફનું પ્રથમ મોટું પગલું માનવામાં આવી રહ્યું છે.

પાકિસ્તાની મધ્યસ્થતા અને ટ્રમ્પની શરત

ડોનાલ્ડ ટ્રમ્પે સ્પષ્ટ કર્યું છે કે આ નિર્ણય પાકિસ્તાનના (Pakistan) વડાપ્રધાન શહબાઝ શરીફ અને સૈન્ય પ્રમુખ અસીમ મુનીર સાથેની વાતચીત બાદ લેવામાં આવ્યો છે. જોકે, આ રોક સશર્ત છે; ઈરાને હવે તણાવ ઓછો કરવા માટે ‘સ્ટ્રેટ ઓફ હોર્મુઝ’ (Strait of Hormuz) ને તાત્કાલિક ફરીથી ખોલવું પડશે.

શાંતિ કરાર તરફ ડગલું

ટ્રમ્પનો દાવો છે કે અમેરિકાએ પોતાના સૈન્ય લક્ષ્યો (Military Objectives) હાંસલ કરી લીધા છે. વૉશિંગ્ટનને ઈરાન તરફથી 10 મુદ્દાઓનો પ્રસ્તાવ મળ્યો છે, જેને વાતચીત માટે વ્યવહારુ આધાર ગણાવવામાં આવ્યો છે.

સીઝફાયરની મુખ્ય બાબતો:

• આ એક ‘ટુ-વે સીઝફાયર’ (Two-way ceasefire) હશે, જેમાં બંને પક્ષો સૈન્ય કાર્યવાહીથી પાછા હટશે.
• આગામી 15 દિવસમાં બંને દેશો શાંતિ કરારને અંતિમ ઓપ આપશે.
• 10 એપ્રિલના રોજ પાકિસ્તાનમાં આ અંગેની મહત્ત્વની બેઠક યોજાય તેવી શક્યતા છે.

વ્હાઇટ હાઉસ (White House) ના પ્રેસ સેક્રેટરી કેરોલિન લેવિટે જણાવ્યું છે કે અમેરિકાની શક્તિશાળી સેનાના દબાણને કારણે ઈરાન નમ્યું છે. આ જાહેરાત બાદ આંતરરાષ્ટ્રીય બજારમાં તેલના ભાવ (Oil Prices) માં પણ મોટી રાહત જોવા મળી છે.