અમેરિકામાં ટેરિફથી બચવા સન ફાર્માનો ડોનાલ્ડ ટ્રમ્પ સરકાર સાથે કરાર: દવાઓના ભાવ ઘટાડવા સહમતિ

Sun Pharma Trump Deal | ભારતની સૌથી મોટી ફાર્માસ્યુટિકલ કંપની (Pharmaceutical Company) સન ફાર્માસ્યુટિકલ ઇન્ડસ્ટ્રીઝ (Sun Pharmaceutical Industries) એ અમેરિકામાં (United States) પોતાના બિઝનેસને સુરક્ષિત કરવા માટે એક મહત્વપૂર્ણ કરાર કર્યો છે.

સન ફાર્મા સહિત વિશ્વની 9 મોટી ફાર્મા કંપનીઓએ વાઇટ હાઉસ (White House) ખાતે અમેરિકી પ્રમુખ ડોનાલ્ડ ટ્રમ્પ (Donald Trump) ના વહીવટીતંત્ર સાથે દવાઓના ભાવો ઘટાડવા અંગેના ઐતિહાસિક સમજૂતી કરાર પર હસ્તાક્ષર કર્યા છે.

આ કરાર હેઠળ કંપની અમેરિકામાં દવાની કિંમતો ઓછી રાખશે, જેના બદલામાં તેને સંભવિત ભારે ટેરિફ (Tariffs) માંથી 2 વર્ષથી વધુ સમય માટે રાહત આપવામાં આવશે.

સન ફાર્માએ શેરબજારને આપેલી માહિતી (Regulatory Filing) માં જણાવ્યું છે કે, તે અમેરિકાના સ્ટેટ મેડિકેડ પ્રોગ્રામ્સ (State Medicaid Programs) અને ભવિષ્યમાં લોન્ચ થનારી પોતાની તમામ ઇનોવેટિવ દવાઓ (Innovative Medicines) માટે ‘મોસ્ટ ફેવર્ડ નેશન’ (Most Favoured Nation – MFN) પ્રાઇસિંગ મોડેલ લાગુ કરશે.

MFN પ્રાઇસિંગનો અર્થ એ થાય છે કે કંપની અન્ય વિકસિત દેશોમાં જે સૌથી નીચા ભાવે દવાઓ વેચે છે, તે જ સસ્તા ભાવે અમેરિકાના સરકારી આરોગ્ય કાર્યક્રમોને પણ દવાઓ ઉપલબ્ધ કરાવશે.

આ કરારના બદલામાં અમેરિકા સરકાર સન ફાર્માની નવીન અને સ્પેશિયાલ્ટી દવાઓ (Speciality Drugs) પર સેક્શન 232 (Section 232) હેઠળ લાદવામાં આવતા સંભવિત ટેરિફને 2 વર્ષથી વધુ સમય માટે મુલતવી રાખશે.

નોંધનીય છે કે ટ્રમ્પ વહીવટીતંત્રે આયાતી બ્રાન્ડેડ દવાઓ પર 100% સુધીનો ટેરિફ લાદવાની ધમકી આપી હતી. જો આ ટેરિફ લાગુ થયો હોત તો ભારતીય ફાર્મા કંપનીઓના માર્જિન પર ભારે અસર પડી હોત.

સન ફાર્માના નોર્થ અમેરિકાના CEO રિક એસ્ક્રાફ્ટે (Rick Ascroft) વાઇટ હાઉસના કાર્યક્રમમાં ભાગ લીધો હતો. તેમણે જણાવ્યું કે અમેરિકા સન ફાર્મા માટે ક્લિનિકલ ડેવલપમેન્ટ (Clinical Development), સેલ્સ અને મેન્યુફેક્ચરિંગ ક્ષેત્રે રોકાણનું મુખ્ય કેન્દ્ર છે. કંપનીની કુલ વૈશ્વિક આવકમાં અમેરિકી માર્કેટનો હિસ્સો આશરે 27% જેટલો છે.

હાલમાં સન ફાર્મા અમેરિકાના ડર્મેટોલોજી (Dermatology) સેગમેન્ટમાં પ્રિસ્ક્રિપ્શનની દ્રષ્ટિએ બીજા નંબરે છે. આ સિવાય કંપની ઓન્કોલોજી (Oncology) અને ઇમ્યુનોલોજી (Immunology) ક્ષેત્રે પણ પોતાનો વિસ્તાર કરી રહી છે.

તાજેતરમાં સન ફાર્માએ ઓર્ગેનોન એન્ડ કંપની (Organon & Co.) નો 11.75 બિલિયન યુએસ ડોલર (USD 11.75 Billion) એટલે કે આશરે રૂ. 98,000 કરોડમાં સોદો કર્યો હતો. 2 વર્ષની ટેરિફ રાહત મળવાથી સન ફાર્માને અમેરિકી બજારમાં પોતાની પકડ વધુ મજબૂત કરવામાં મોટી મદદ મળશે.