કેનેડાથી 5 વર્ષ પછી ભારત પરત ફરેલા વિદ્યાર્થીની દર્દનાક આપવીતી: ‘પૈસા કમાવવાનું બંધ થતાં જ લોકોનો વ્યવહાર બદલાઈ ગયો’

Canada Return Student | કેનેડા (Canada)માં લાંબો સમય વિતાવ્યા બાદ ભારત પરત ફરેલા એક 26 વર્ષના ભારતીય વિદ્યાર્થીએ સોશિયલ મીડિયા પર પોતાની એક અત્યંત હૃદયસ્પર્શી અને કડવી વાસ્તવિકતા શેર કરી છે.

કેનેડામાં 5 વર્ષ સુધી સખત મહેનત કરવા છતાં જ્યારે તેને ત્યાંની પરમેનન્ટ રેસિડેન્સી (Permanent Residency – PR) ન મળી, ત્યારે તેણે ભારે હૈયે સ્વદેશ પરત ફરવાનો નિર્ણય લીધો હતો.

વિદેશમાં વિતાવેલા આ વર્ષો દરમિયાન તે પોતાના પરિવાર અને મિત્રોને ખૂબ જ મિસ (Miss) કરતો હતો, પરંતુ ભારત પરત આવ્યા બાદ તેને જે અનુભવ થયો તે કોઈ આંચકાથી ઓછો નહોતો.

વિદ્યાર્થીએ સોશિયલ મીડિયા પ્લેટફોર્મ રેડિટ (Reddit) પર એક પોસ્ટ દ્વારા પોતાનું દર્દ વ્યક્ત કરતા લખ્યું છે કે, ભારત આવ્યા પછી લોકો તેની પ્રાઈવસીને માન આપવાને બદલે સતત તેની અંગત બાબતોમાં દખલગીરી કરી રહ્યા છે. પરંતુ તેને સૌથી વધુ દુઃખ એ વાતનું લાગ્યું છે કે હાલમાં તે કશું કમાતો ન હોવાથી લોકોનો તેના પ્રત્યેનો વ્યવહાર અને નજરિયો તદ્દન બદલાઈ ગયા છે.

“હું જ્યાં પણ જાઉં છું, લોકો મને પૂછે છે કે તેં હજુ સુધી લગ્ન કેમ નથી કર્યા? હું 26 વર્ષનો છું અને એવું લાગે છે કે લોકોને માત્ર મારા લગ્નની જ ચિંતા છે.”

તેણે ભૂતકાળને યાદ કરતા જણાવ્યું કે, “જ્યારે હું કેનેડામાં હતો, ત્યારે મેં સ્ટુડન્ટ લોન (Student Loan) લીધી હતી, જે હું પોતે જ ચૂકવી રહ્યો છું. આ સિવાય હું દર મહિને પરિવારના ખર્ચ અને ઈએમઆઈ (EMI) ચૂકવવા માટે ઘરે પૈસા મોકલતો હતો. ત્યારે બધું બરાબર ચાલતું હતું. પરંતુ હવે જ્યારે મારી પાસે કમાણી નથી, ત્યારે લોકો મને સપોર્ટ (Support) કરવાને બદલે એવું કહી રહ્યા છે કે મેં ત્યાં પીઆર (PR) મેળવવા માટે પૂરતી મહેનત નહોતી કરી અને મારે કેનેડા જવું જ ન જોઈતું હતું.”

After 5 years in Canada, I had to come back to India. I wasn’t prepared for how different people would treat me.
by
u/anasm17 in
returnToIndia

તેણે આગળ ઉમેર્યું કે, જ્યારે હું વિદેશમાં હતો ત્યારે લોકો જે રીતે મારી સાથે વાત કરતા હતા અને આજે જે રીતે વર્તે છે, તે જોવું ખરેખર હૃદય તોડી નાખનારું છે. લોકો તમારી કિંમત ફક્ત તમે ક્યાં રહો છો અને કેટલા પૈસા કમાઓ છો તેના આધારે જ નક્કી કરે છે.

કેટલીકવાર મને એવો પણ વિચાર આવે છે કે મારે કેનેડામાં ગેરકાયદેસર (Illegally) જ રોકાઈ જવું જોઈતું હતું, આ પ્રકારના નકારાત્મક વિચારોથી હું માનસિક રીતે ખૂબ જ લો ફીલ કરી રહ્યો છું. આ પોસ્ટ વાયરલ (Viral) થતાં જ અનેક યુઝર્સે (Users) તેના પ્રત્યે સહાનુભૂતિ દર્શાવી છે અને તેને બીજાના મહેણાં પર ધ્યાન આપવાને બદલે પોતાના કરિયર પર ફોકસ કરવાની સલાહ આપી છે.