કેનેડામાં પત્નીની હત્યાના કેસમાં ભારતીય મૂળના જગપ્રીત સિંહ દોષિત ઠર્યા; કોર્ટે ‘ભૂલથી છરી વાગી’ હોવાની દલીલ ફગાવી

Punjab Man Murder his wife in Canada | કેનેડા (Canada)ના બ્રિટિશ કોલંબિયા (British Columbia) પ્રાંતમાં પત્નીની ઘાતકી હત્યા કરવા બદલ 53 વર્ષીય ભારતીય મૂળના વ્યક્તિ જગપ્રીત સિંહ (Jagpreet Singh)ને કોર્ટે સેકન્ડ-ડિગ્રી મર્ડર (Second-Degree Murder) માટે દોષિત ઠેરવ્યો છે.

જગપ્રીત સિંહ ભારતથી કેનેડા પહોંચ્યો તેના માત્ર 6 જ દિવસ બાદ આ હત્યાની ઘટના બની હતી. કોર્ટે જગપ્રીતની એ દલીલને સંપૂર્ણપણે ફગાવી દીધી છે જેમાં તેણે દાવો કર્યો હતો કે ઝઘડા દરમિયાન ભૂલથી તેની પત્નીને છરી વાગી ગઈ હતી.

આ સમગ્ર મામલો એબોટ્સફોર્ડ (Abbotsford) શહેરના વેગનર ડ્રાઇવ (Wagner Drive) વિસ્તારનો છે, જ્યાં 41 વર્ષીય બલવિંદર કૌર (Balwinder Kaur) બેઝમેન્ટ એપાર્ટમેન્ટ (Basement Apartment)માં રહેતી હતી.

જગપ્રીત અને બલવિંદરના લગ્નને લગભગ 20 વર્ષ થયા હતા અને તેમને બે બાળકો છે. બલવિંદર કૌર વર્ષ 2021માં પોતાની પુત્રીના ઉચ્ચ અભ્યાસ અને ત્યારબાદ તેની ગંભીર તબીબી સારવાર માટે કેનેડા શિફ્ટ થઈ હતી. તેણે જ પોતાના પતિ જગપ્રીત સિંહના વિઝિટર વિઝા (Visitor Visa) માટે સ્પોન્સરશિપ (Sponsorship) મોકલી હતી, જેના આધારે જગપ્રીત 9 માર્ચ 2024ના રોજ કેનેડા પહોંચ્યો હતો.

એરપોર્ટ (Airport) પર પત્નીએ તેનું સ્વાગત કર્યું અને સોશિયલ મીડિયા પર ફોટા પણ શેર કર્યા હતા, પરંતુ આ પુનઃમિલન માત્ર 6 દિવસમાં જ અત્યંત લોહિયાળ સાબિત થયું.

15 માર્ચ 2024ના રોજ પોલીસને આ ઘરમાંથી છરાબાજી (Stabbing) અંગેનો ફોન આવ્યો હતો. જ્યારે પોલીસ અધિકારીઓ ઘટનાસ્થળે પહોંચ્યા, ત્યારે બલવિંદર કૌર લોહીના ખાબોચિયામાં બેભાન અવસ્થામાં મળી આવી હતી. તેના ગળાના ભાગે 4 અને છાતીના ભાગે 4 એમ કુલ 8 જેટલા છરીના ઊંડા ઘા મારવામાં આવ્યા હતા.

હોસ્પિટલ (Hospital) લઈ જતાં જ તેને મૃત જાહેર કરવામાં આવી હતી. ઘટનાસ્થળેથી એક તૂટેલી સ્ટેક નાઈફ (Steak Knife) મળી આવી હતી, જેનો હાથો મૃતદેહની નજીક પડ્યો હતો. જ્યારે પોલીસ અંદર પ્રવેશી ત્યારે જગપ્રીત સિંહ બેઝમેન્ટના સોફા પર બેઠો હતો અને પોલીસ સામે તાકી રહ્યો હતો. તે ભારે આઘાતમાં (Shock) હોય તેવું લાગતું હતું અને અંગ્રેજી (English) ન જાણતો હોવાથી વાત સમજી શકતો ન હતો.

ટ્રાયલ (Trial) દરમિયાન, જગપ્રીતે સ્વીકાર્યું કે પત્નીનું મોત તેના કારણે થયું છે, પરંતુ તેણે મર્ડર (Murder)નો ઇનકાર કર્યો હતો. તેના બચાવ પક્ષે દલીલ કરી હતી કે આ કૃત્ય અચાનક ઉશ્કેરણી (Sudden Provocation)ના કારણે ગુસ્સામાં થયું હતું.

જગપ્રીતે કોર્ટને જણાવ્યું કે તેની પત્નીએ પહેલા તેના પર છરી ચલાવી હતી અને તે માત્ર બચાવ કરવાનો પ્રયાસ કરી રહ્યો હતો. જોકે, બ્રિટિશ કોલંબિયા સુપ્રીમ કોર્ટ (Supreme Court)ના જસ્ટિસ એન્ડ્રિયા ઓર્મિસ્ટન (Justice Andrea Ormiston) આ વાત સાથે સહમત થયા નહોતા. જજે જગપ્રીતની જુબાનીને અવિશ્વસનીય અને અવિશ્વાસપાત્ર ગણાવી હતી.

તપાસમાં સામે આવ્યું છે કે કેનેડા આવતા પહેલા બંને વચ્ચેના સંબંધો સામાન્ય નહોતા. બંને વચ્ચે અઠવાડિયા સુધી ફોન કે વોટ્સએપ પર કોઈ વાતચીત થઈ નહોતી. બલવિંદરે તેના મિત્રોને જણાવ્યું હતું કે તે પોતાના પતિથી ડરતી હતી અને તે કેનેડા આવે તેમ ઈચ્છતી નહોતી.

જુલાઈ 2024માં જગપ્રીતે પોતાને નિર્દોષ જાહેર કર્યો હતો, પરંતુ હવે કોર્ટે તેને ગુનેગાર ઠેરવ્યો છે. હાલમાં જગપ્રીત સિંહનું સાયકોલોજીકલ એસેસમેન્ટ (Psychological Assessment) ચાલી રહ્યું છે અને ઓક્ટોબર મહિના પછી તેને સત્તાવાર સજા સંભળાવવામાં આવશે.