સોહરાબુદ્દીન એન્કાઉન્ટર કેસ: બોમ્બે હાઈકોર્ટે 22 આરોપીઓને નિર્દોષ જાહેર કરવાના ચુકાદાને યથાવત રાખ્યો

Sohrabuddin Encounter Case | બોમ્બે હાઈકોર્ટે (Bombay High Court) ગુરુવારે સોહરાબુદ્દીન શેખ એન્કાઉન્ટર કેસમાં એક મહત્વપૂર્ણ ચુકાદો આપ્યો છે. કોર્ટે સોહરાબુદ્દીનના ભાઈ રુબાબુદ્દીન શેખ દ્વારા દાખલ કરવામાં આવેલી અરજીને ફગાવી (Rejected) દીધી છે.

આ અરજીમાં મુંબઈની સેશન્સ કોર્ટના 2018 ના તે ચુકાદાને પડકારવામાં આવ્યો હતો, જેમાં ગુજરાત અને રાજસ્થાનના પોલીસ કર્મચારીઓ (Police Personnel) સહિત તમામ 22 આરોપીઓને નિર્દોષ જાહેર કરવામાં આવ્યા હતા.

હાઈકોર્ટના ચીફ જસ્ટિસ (Chief Justice) ચંદ્રશેખર અને ગૌતમ અંખાદની બેન્ચે જણાવ્યું હતું કે ટ્રાયલ કોર્ટના ચુકાદામાં દખલ કરવા માટે કોઈ મજબૂત કાનૂની આધાર (Legal Ground) જણાતો નથી.

આ વિવાદાસ્પદ કેસની વિગતો જોઈએ તો તેની શરૂઆત 23 નવેમ્બર 2005 ના રોજ થઈ હતી. સોહરાબુદ્દીન શેખ, તેની પત્ની કૌસર બી અને સાથી તુલસીરામ પ્રજાપતિ હૈદરાબાદથી મહારાષ્ટ્રના સાંગલી તરફ બસમાં મુસાફરી કરી રહ્યા હતા.

તેલંગાણાના ઝહિરાબાદ પાસે ગુજરાત અને રાજસ્થાન પોલીસની સંયુક્ત ટીમે બસ અટકાવી ત્રણેયની અટકાયત (Detention) કરી હતી. CBI ના અહેવાલ મુજબ, 25 અને 26 નવેમ્બર 2005 ની મધ્યરાત્રિએ સોહરાબુદ્દીનનું કથિત નકલી એન્કાઉન્ટર (Fake Encounter) કરવામાં આવ્યું હતું. ત્યારબાદ કૌસર બીની પણ હત્યા કરવામાં આવી હતી અને 28 નવેમ્બર 2005 ના રોજ તેના મૃતદેહનો નિકાલ કરવામાં આવ્યો હતો.

પોલીસે તે સમયે દાવો કર્યો હતો કે સોહરાબુદ્દીન આતંકી સંગઠન લશ્કર-એ-તોઈબા (Lashkar-e-Taiba) સાથે જોડાયેલો હતો અને તે ગુજરાતના એક પ્રભાવશાળી રાજકીય નેતાની હત્યાના કાવતરા સાથે આવ્યો હતો.

જોકે, તપાસ એજન્સી CBI એ આ દાવાઓને નકારીને તેને પૂર્વનિયોજિત હત્યા ગણાવી હતી. આ કેસમાં એક વર્ષ બાદ 28 ડિસેમ્બર 2006 ના રોજ મુખ્ય સાક્ષી તુલસીરામ પ્રજાપતિનું પણ એન્કાઉન્ટર થયું હતું. તપાસમાં બહાર આવ્યું હતું કે પ્રજાપતિ સોહરાબુદ્દીન અને કૌસર બીના અપહરણનો મુખ્ય પ્રત્યક્ષદર્શી (Eyewitness) હતો, તેથી તેને દૂર કરવામાં આવ્યો હતો.

વર્ષ 2010 માં સુપ્રીમ કોર્ટના (Supreme Court) આદેશ બાદ આ કેસની તપાસ CBI ને સોંપવામાં આવી હતી. લાંબી કાનૂની પ્રક્રિયા બાદ 2018 માં મુંબઈની સ્પેશિયલ CBI કોર્ટે (Special Court) અપૂરતા પુરાવાઓને કારણે તમામ 22 આરોપીઓને મુક્ત કર્યા હતા. ટ્રાયલ દરમિયાન કુલ 210 સાક્ષીઓની તપાસ કરવામાં આવી હતી, જેમાંથી 92 સાક્ષીઓ હોસ્ટાઈલ (Hostile) એટલે કે ફરી ગયા હતા.

પુરાવાઓની કડીઓ તૂટી જવાને કારણે કોર્ટે આરોપીઓને શંકાનો લાભ આપ્યો હતો. હવે બોમ્બે હાઈકોર્ટે પણ આ મુક્તિના આદેશ પર મહોર મારી દીધી છે, જે રુબાબુદ્દીન શેખ અને તુલસીરામની માતા નર્મદાબાઈની લાંબી કાનૂની લડત (Legal Battle) માટે મોટો આંચકો માનવામાં આવે છે.