…તો નોબેલ પ્રાઈઝનું નામ બદલીને ‘ટ્રમ્પ પ્રાઈઝ’ કરી દો: અમેરિકાના સેનેટર કેમ આમ કહ્યું!

Trump Nobel Prize | મિડલ ઇસ્ટ (Middle East) માં ચાલી રહેલા મહાયુદ્ધની આગ હવે વધુ ભયાનક બની રહી છે. બંદર અબ્બાસ પર અમેરિકી એરસ્ટ્રાઈક (Airstrike) બાદ ઈરાને પણ ભારે ગુસ્સામાં કુવૈતમાં આવેલા અમેરિકી એરબેઝ પર જવાબી હમલા કર્યા છે. આ ગંભીર તણાવ વચ્ચે અમેરિકી સીનેટર (US Senator) લિન્ડસે ગ્રાહમે રાષ્ટ્રપતિ ડોનાલ્ડ ટ્રમ્પના સમર્થનમાં એક મોટું નિવેદન આપ્યું છે.

ફોક્સ ન્યૂઝ (Fox News) સાથે વાતચીત કરતી વખતે લિન્ડસે ગ્રાહમે ખુલ્લેઆમ ટ્રમ્પના વખાણ કર્યા હતા. તેમણે જણાવ્યું કે જો ડોનાલ્ડ ટ્રમ્પ (Donald Trump) સાઉદી અરેબિયાને ઇઝરાયલ (Israel) ને સત્તાવાર માન્યતા આપવા માટે રાજી કરી લે છે, તો ‘નોબેલ પીસ પ્રાઈઝ’ (Nobel Peace Prize) નું નામ બદલીને ‘ટ્રમ્પ પ્રાઈઝ’ કરી દેવું જોઈએ.

સીનેટરે વધુમાં ઉમેર્યું કે, “આપણા આરબ સાથી દેશોએ પ્રમુખ ટ્રમ્પને મદદ કરવી જ જોઈએ. જો તમે તેમને ‘ના’ કહો છો, તો તે તમારા પોતાના દેશ માટે ભવિષ્યમાં ખતરનાક સાબિત થઈ શકે છે.”

હકીકતમાં, ડોનાલ્ડ ટ્રમ્પે મિડલ ઇસ્ટના તણાવ વચ્ચે ઈરાન સાથેની કોઈપણ સંભવિત ડીલને ‘અબ્રાહમ એકોર્ડ્સ’ (Abraham Accords) સાથે જોડી દીધી છે. અમેરિકી પ્રમુખે સ્પષ્ટ સંકેતો આપ્યા છે કે સાઉદી અરેબિયા, કતાર, પાકિસ્તાન, તૂર્કીયે અને ઇજિપ્ત જેવા દેશોએ ઇઝરાયલ સાથે રાજદ્વારી સંબંધો સામાન્ય કરવા માટે આ શાંતિ કરાર પર તાત્કાલિક હસ્તાક્ષર કરવા જ પડશે.

ટ્રમ્પે ઇશારામાં ખાડી દેશોને ચેતવણી આપતા કહ્યું કે આ મુસ્લિમ રાષ્ટ્રો અમેરિકાના ઋણી (Debtors) છે. જો તેઓ આ ફ્રેમવર્ક સ્વીકારવાનો ઇનકાર કરશે, તો વોશિંગ્ટન (Washington) મિડલ ઇસ્ટમાં શાંતિ સ્થાપવાના પોતાના પ્રયાસોને મર્યાદિત અથવા બંધ કરી શકે છે. હાલ તેમના વિશેષ દૂત સ્ટીવ વિટકોફ અને જમાઈ જેરેડ કુશનર આ મિશન પર સતત કામ કરી રહ્યા છે.

અબ્રાહમ એકોર્ડ્સ એક એવો ઐતિહાસિક કરાર છે, જેની શરૂઆત વર્ષ 2020 માં ટ્રમ્પના પ્રથમ કાર્યકાળ દરમિયાન થઈ હતી. આ કરારનો મુખ્ય હેતુ ઇઝરાયલ અને આરબ દેશો વચ્ચે વેપાર, ટેકનોલોજી અને પ્રવાસન જેવા ક્ષેત્રોમાં સંબંધો સ્થાપિત કરવાનો છે.

સૌપ્રથમ UAE અને બહેરીને આના પર સહી કરી હતી અને બાદમાં મોરોક્કો અને સુદાન પણ જોડાયા હતા. અમેરિકાનો દાવો છે કે આ સમજૂતી મિડલ ઇસ્ટના ઇતિહાસમાં 1979 માં ઇજિપ્ત અને 1994 માં જોર્ડન સાથે થયેલી શાંતિ સંધિઓ પછીનો સૌથી મોટો રાજદ્વારી બદલાવ છે.