મિડલ ઈસ્ટમાં મહાયુદ્ધની આશંકા: ઈરાને જોર્ડન, બહેરીન અને કુવૈતમાં આવેલા અમેરિકી સૈન્ય મથકો પર કર્યો મિસાઈલ અને ડ્રોન હુમલો

Iran attacks US bases | મિડલ ઈસ્ટ (Middle East) માં લાંબા સમયથી ચાલી રહેલો તણાવ હવે ખુલ્લા યુદ્ધમાં ફેરવાઈ ગયો હોય તેવું લાગી રહ્યું છે. ઈરાનના સત્તાવાર સરકારી મીડિયાના અહેવાલો અનુસાર, ઈરાનની ઈસ્લામિક રિવોલ્યુશનરી ગાર્ડ કોર્પ્સ (IRGC) એ જોર્ડન, બહેરીન અને કુવૈતમાં આવેલા અમેરિકી સૈન્ય મથકો (US Military Bases) ને નિશાન બનાવીને શ્રેણીબદ્ધ મિસાઈલ અને ડ્રોન હુમલા કર્યા છે. આ હુમલા બાદ સમગ્ર ગલ્ફ પ્રદેશમાં હાઈ એલર્ટ જાહેર કરી દેવામાં આવ્યું છે.

અમેરિકી મથકોને બનાવ્યા નિશાન

ઈરાનની સત્તાવાર સમાચાર એજન્સી ‘ઇરના’ (IRNA) એ ગાર્ડ્સના નિવેદનોને ટાંકીને જણાવ્યું છે કે, ઈરાની દળોએ જોર્ડનમાં આવેલા પ્રિન્સ હસન એર બેઝ (Prince Hassan Air Base) પર હુમલો કર્યો છે.

આ ઉપરાંત બહેરીનમાં સ્થિત અમેરિકી સૈન્યના ડ્રોન કમાન્ડ સેન્ટર (Drone Command Center) અને કુવૈતમાં આવેલા અલી અલ-સાલેમ (Ali Al-Salem) સહિતના અન્ય સૈન્ય મથકો પર ઘાતક પ્રહારો કરવામાં આવ્યા છે.

ઈરાને દાવો કર્યો છે કે આ જવાબી હુમલાઓ અમેરિકા દ્વારા તાજેતરમાં ઈરાની સરહદો પર કરવામાં આવેલી સૈન્ય કાર્યવાહીના વિરોધમાં કરવામાં આવ્યા છે.

બહેરીનમાં એર રેડ સાયરન ગુંજી

હુમલાની તીવ્રતા એટલી વધારે હતી કે બહેરીનમાં મિસાઈલ એલર્ટની સાયરન (Missile Alert Sirens) એક પછી એક બે વાર ગુંજી ઉઠી હતી.

બહેરીનના ગૃહ મંત્રાલયે સોશિયલ મીડિયા પ્લેટફોર્મ X પર તાકીદની સૂચના જારી કરીને પોતાના નાગરિકો અને રહેવાસીઓને શાંતિ જાળવવા તેમજ તુરંત જ નજીકના સુરક્ષિત આશ્રયસ્થાનો (Safe Shelter) માં જતા રહેવા માટે આદેશ આપ્યો હતો.

શા માટે વધ્યો વિવાદ?

આ તાજેતરનો વિવાદ ત્યારે શરૂ થયો જ્યારે ઈરાને વ્યૂહાત્મક રીતે મહત્વપૂર્ણ ગણાતી હોર્મુઝની ખાડી (Strait of Hormuz) ને સંપૂર્ણપણે બંધ કરવાની જાહેરાત કરી દીધી.

હોર્મુઝની ખાડીમાં ઈરાન દ્વારા એક કોમર્શિયલ શિપ (Commercial Ship) પર હુમલો કરવામાં આવ્યો હતો, જેમાં આગ લાગ્યા બાદ ક્રૂ મેમ્બર્સને જહાજ છોડવું પડ્યું હતું.

આ ઘટનાના જવાબમાં અમેરિકી દળોએ ઈરાનના મિસાઈલ અને સૈન્ય ઠેકાણાઓ પર નવા રાઉન્ડના હવાઈ હુમલા કર્યા હતા.

જેના પ્રત્યાઘાત રૂપે ઈરાને આ મોટો વળતો પ્રહાર કરીને અમેરિકી મથકોને ધમરોળ્યા છે. આ હુમલાઓ બાદ વૉશિંગ્ટન અને તેહરાન વચ્ચે યુદ્ધ વિરામ (Ceasefire) કરાવવાના રાજદ્વારી પ્રયાસોને મોટો ફટકો પડ્યો છે.