‘ટ્રમ્પે બતાવી દીધો અસલી રંગ…’, શું ઈઝરાયલ-US ના હુમલાથી ઈરાનને બચાવશે રશિયા?

Iran Attack russia usa israel | અમેરિકા અને ઈઝરાયલના સંયુક્ત સૈન્ય હુમલા (Military Attack) બાદ વૈશ્વિક રાજનીતિમાં ગરમાવો આવી ગયો છે. રાજધાની તહેરાન (Tehran) માં અનેક ધમાકા અને સમગ્ર ઈરાનમાં હુમલાના સમાચાર વચ્ચે રશિયા તરફથી તીખી પ્રતિક્રિયા સામે આવી છે. રશિયન સુરક્ષા પરિષદના ઉપાધ્યક્ષ દિમિત્રી મેદવેદેવે અમેરિકી રાષ્ટ્રપતિ ડોનાલ્ડ ટ્રમ્પ પર સીધો હુમલો કરતા કહ્યું કે ટ્રમ્પે ફરી એકવાર પોતાનો “અસલી રંગ” બતાવી દીધો છે.

રશિયાના મેદવેદેવે કટાક્ષ કરતા કહ્યું કે પોતાને “શાંતિદૂત” (Peacemaker) ગણાવનાર ટ્રમ્પે ફરી સૈન્ય માર્ગ પસંદ કર્યો છે. તેમનું આ નિવેદન એવા સમયે આવ્યું છે જ્યારે અમેરિકા અને ઈઝરાયલે શનિવારે ઈરાન વિરુદ્ધ મોટું અભિયાન શરૂ કર્યું. પ્રારંભિક હુમલાના સમાચાર તહેરાનથી આવ્યા, જ્યાં સર્વોચ્ચ નેતા અલી ખામेनेઈની ઓફિસ પાસે ધમાકા થયાના અહેવાલ મળ્યા હતા. ઈરાની મીડિયા મુજબ દેશના અનેક ભાગોમાં હવાઈ હુમલા થયા અને રાજધાની ઉપર ધુમાડાના ગોટેગોટા જોવા મળ્યા હતા.

ટ્રમ્પે સોશિયલ મીડિયા પર જારી કરેલા વિડિયો સંદેશમાં કહ્યું કે અમેરિકી સેનાએ ઈરાનમાં “મોટું સૈન્ય અભિયાન” શરૂ કરી દીધું છે. તેમણે આરોપ લગાવ્યો કે ઈરાન સતત પોતાનો પરમાણુ કાર્યક્રમ (Nuclear Program) આગળ વધારી રહ્યું છે અને એવી મિસાઈલો વિકસાવી રહ્યું છે જે અમેરિકા સુધી પહોંચી શકે છે. ટ્રમ્પનું કહેવું છે કે આ કાર્યવાહી અમેરિકી જનતાની સુરક્ષા માટે જરૂરી હતી.

રશિયાએ જોકે, આ સમગ્ર અભિયાનને ખતરનાક અને અસ્થિર કરનારું પગલું ગણાવ્યું છે. મેદવેદેવના નિવેદનને મોસ્કોની કડક ચેતવણી તરીકે જોવામાં આવી રહ્યું છે. વિશ્લેષકો માને છે કે રશિયાનો આ વલણ સંકેત આપે છે કે તે ઈરાન વિરુદ્ધ સૈન્ય કાર્યવાહીનું ખુલ્લેઆમ સમર્થન નહીં કરે અને રાજદ્વારી મોરચે (Diplomatic Front) અમેરિકાને ઘેરવાનો પ્રયાસ કરી શકે છે.

હુમલા પહેલા અમેરિકાએ મધ્ય પૂર્વમાં મોટા પાયે સૈન્ય તૈનાતી (Military Deployment) કરી હતી અને અનેકવાર ઈરાનને સમજૂતી માટે ચેતવણી આપી હતી. હવે રશિયાના તીખા નિવેદન બાદ આ સંકટ વધુ જટિલ બનતું દેખાઈ રહ્યું છે. આંતરરાષ્ટ્રીય સમુદાયની નજર એ વાત પર છે કે શું આ સંઘર્ષ મર્યાદિત રહેશે કે પછી મોટા પ્રાદેશિક સંઘર્ષમાં બદલાઈ શકે છે. ઈરાન પર અમેરિકી દબાણ વચ્ચે રશિયા તરફથી સતત ટ્રમ્પને ચેતવણી આપવામાં આવી રહી હતી.