દુબઈમાં ટાયર પંક્ચર થતાં રસ્તા પર ઊભેલી 21 વર્ષીય ભારતીય વિદ્યાર્થિનીને કારે કચડી, કરુણ મોત

દુબઈમાં માર્ગ અકસ્માતની એક કરુણ ઘટનામાં 21 વર્ષીય ભારતીય વિદ્યાર્થિનીનું મોત નીપજ્યું છે. કોલેજ જતી વખતે કારનું ટાયર પંક્ચર થતાં રસ્તા પર મદદની રાહ જોઈ રહેલી યુવતીને પૂરઝડપે આવતી કારે અડફેટે લીધી હતી. આ અકસ્માતમાં કેરળના થોડુપુઝાની રહેવાસી નૈફા બાલ્કીઝ હમીદનું ઘટનાસ્થળે જ મોત થયું હતું.

નૈફા કેનેડિયન યુનિવર્સિટી દુબઈમાં આર્કિટેક્ચરના અંતિમ વર્ષમાં અભ્યાસ કરતી હતી. અકસ્માતના દિવસે તે કોલેજ જવા માટે કાર ચલાવી રહી હતી ત્યારે અલ ખવનીજ સ્ટ્રીટ પર તેની કારનું ટાયર પંક્ચર થયું હતું. આ અંગે તેણે ભારતમાં હાજર પોતાના પિતા બિનુ હમીદને ફોન કરીને જાણ કરી હતી.

પિતાએ પુત્રીને રોડસાઇડ આસિસ્ટન્સ બોલાવવાની સલાહ આપી હતી. સાથે જ કારને વર્કશોપમાં મોકલાવી દેવા અને કોલેજ જવા માટે ટેક્સીનો ઉપયોગ કરવાનું જણાવ્યું હતું. જોકે, આ વાતચીતની લગભગ 5 મિનિટ બાદ પિતાએ ફરીથી પુત્રીને ફોન કર્યો હતો, પરંતુ તેણે ફોન ઉપાડ્યો નહોતો.

ત્યારબાદ દુબઈ પોલીસ તરફથી પરિવારને અકસ્માતની જાણ કરવામાં આવી હતી. પરિવારને મળેલી માહિતી મુજબ, નૈફા પોતાની કારની પાછળ ઊભી રહીને મદદની રાહ જોઈ રહી હતી ત્યારે પૂરઝડપે આવેલી કારે તેને અડફેટે લીધી હતી. ગંભીર અકસ્માતમાં તેનું ઘટનાસ્થળે જ મોત થયું હતું.

પરિવારના જણાવ્યા અનુસાર, અકસ્માત સર્જનાર કારના ચાલકની ધરપકડ કરવામાં આવી છે અને સમગ્ર મામલે તપાસ ચાલી રહી છે.
નૈફા તાજેતરમાં પરિવાર સાથે કેરળમાં લગ્નપ્રસંગમાં હાજરી આપવા આવી હતી. જોકે, કોલેજના અભ્યાસમાં ખલેલ ન પડે તે માટે તે પોતાની માતા સાથે દુબઈ પરત ફરી હતી. તેના પિતા, ભાઈ અને ભાભી કેરળમાં જ રોકાયા હતા. નૈફાના પરિવારે તેના ઉચ્ચ અભ્યાસને ધ્યાનમાં રાખીને દુબઈમાં વસવાટ કર્યો હતો.

પરિવારજનોના જણાવ્યા મુજબ, નૈફા 18 વર્ષની ઉંમરથી કાર ચલાવતી હતી અને વિવિધ વાહનો ચલાવવામાં નિપુણ હતી. તેના અચાનક નિધનથી પરિવારજનોમાં શોકની લાગણી ફેલાઈ છે. રવિવારે તેના વતન કેરળના થોડુપુઝામાં તેને અંતિમ વિદાય આપવામાં આવી હતી.