ખેડૂતો માટે ખુશખબર: ટ્રેક્ટર-ટ્રોલી પાસિંગમાં 5 વર્ષની મુક્તિ અને તાર ફેન્સિંગ સબસીડીમાં મોટો વધારો

Gujarat Agriculture Minister Decision: ગુજરાતના ખેડૂતોના હિત માટે રાજ્ય સરકાર હંમેશા તત્પર છે. કૃષિ મંત્રી (Agriculture Minister) જીતુભાઈ વાઘાણીએ ભારતીય કિસાન સંઘ (Bhartiya Kisan Sangh) સાથેની બેઠક બાદ ખેડૂતો માટે અનેક મહત્વના નિર્ણયોની જાહેરાત કરી છે. મંત્રીએ સ્પષ્ટપણે જણાવ્યું કે, ખેડૂતોએ ચિંતા કરવાની જરૂર નથી, સરકાર હકારાત્મક અભિગમ સાથે તેમની પડખે ઉભી છે.

ટ્રેક્ટર-ટ્રોલી પાસિંગ અને સબસીડીમાં મોટી રાહત

ખેડૂતોને પડતી વહીવટી મુશ્કેલીઓ દૂર કરવા માટે સરકારે ઐતિહાસિક નિર્ણયો લીધા છે:

RTO પાસિંગમાં મુક્તિ: ટ્રેક્ટર-ટ્રોલીના પાસિંગ (Passing) માટે ખેડૂતોને પડતી હાલાકી રોકવા માટે 3 થી 5 વર્ષ સુધી RTO પાસિંગમાંથી મુક્તિ આપવાની સૈદ્ધાંતિક મંજૂરી આપવામાં આવી છે.

ડ્રીપ ઇરિગેશન સબસીડી: ફુવારા અને ડ્રીપ પદ્ધતિ (Drip Irrigation) અપનાવતા ખેડૂતો માટે સબસીડી (Subsidies) વધારવા મુખ્યમંત્રી ભૂપેન્દ્ર પટેલે મંજૂરી આપી છે, જેથી ઓછા પાણીએ વધુ ઉત્પાદન મેળવી શકાય.

તાર ફેન્સિંગ યોજનામાં સુધારો

ખેતરમાં ઊભા પાકને જંગલી પશુઓથી બચાવવા માટેની તાર ફેન્સિંગ (Wire Fencing) યોજનાને વધુ સરળ બનાવવામાં આવી છે. હવે 2 હેક્ટર જમીન ધરાવતા નાના ખેડૂતો પણ આનો લાભ લઈ શકશે. આ ઉપરાંત, સબસીડીની રકમ જે અગાઉ રનિંગ ફૂટ દીઠ 200 રૂપિયા હતી, તેને વધારીને 300 રૂપિયા કરવાના નિર્દેશ આપવામાં આવ્યા છે.

સિંચાઈ અને શિક્ષણ ક્ષેત્રે મહત્વના પગલાં

વડાપ્રધાન નરેન્દ્ર મોદીના વિઝન મુજબ સુજલામ-સુફલામ અને સૌની યોજના (SAUNI Yojana) અંતર્ગત ગામડાના તળાવો ભરવાની કામગીરી તેજ કરાશે. પાઈપલાઈન થકી ચેકડેમો અને તળાવો ભરીને ખેડૂતોના પાણીના તળ ઊંચા લાવવાનો પ્રયાસ થશે.

બીજી તરફ, રાજ્યની ખાનગી કૃષિ કોલેજો (Private Agriculture Colleges) માં શિક્ષણની ગુણવત્તા જળવાય તે માટે ICAR ના નિયમોનું કડક પાલન કરાવવામાં આવશે. નીતિન સાંગવાનના અધ્યક્ષપદે બનેલી કમિટી આ અંગે તપાસ કરશે અને જે કોલેજો નિયમોનું ઉલ્લંઘન કરશે તેમની એડમિશન પ્રક્રિયા રદ કરવામાં આવશે.

આ ઉપરાંત, વીજ ટાવર (Power Tower) ના વળતર માટે નવી પોલિસી અને રાસાયણિક ખાતર વિતરણ વ્યવસ્થાને વધુ સરળ બનાવવાની ખાતરી પણ કૃષિ મંત્રી દ્વારા આપવામાં આવી છે.