ઉમર 12, 14, 16 વર્ષ… કોરિયન ગેમની લતને કારણે 3 સગી બહેનોએ 9મા માળેથી કૂદીને આત્મહત્યા કરી

3 sisters suicide in Ghaziabad | ઉત્તર પ્રદેશના ગાઝિયાબાદ (Ghaziabad)માં એક હચમચાવી દેનારો કિસ્સો સામે આવ્યો છે. અહીં ભારત સિટી (Bharat City) સોસાયટીમાં રહેતી ત્રણ સગી બહેનોએ ઓનલાઇન ગેમ (Online Game) ની લતને કારણે નવમા માળેથી કૂદીને પોતાનું જીવન ટૂંકાવ્યું છે. પોલીસે આપેલી માહિતી મુજબ, 16 વર્ષની નિશિકા, 14 વર્ષની પ્રાચી અને 12 વર્ષની પાખીએ મંગળવારે રાત્રે 2 વાગ્યે એકસાથે આ પગલું ભર્યું હતું.

કોરિયન ગેમની હતી ભયંકર લત

મૃતક યુવતીઓના પિતા ચેતન કુમારે જણાવ્યું કે, કોરોના કાળથી ત્રણેય દીકરીઓને મોબાઈલ ગેમની લત લાગી હતી. તેઓ કોરિયન લવ ગેમ (Korean Love Game) અને ટાસ્ક બેઝ્ડ ઓનલાઇન ગેમ્સ રમતી હતી. આ ગેમનું ઘેલું એટલું હતું કે તેઓએ છેલ્લા બે વર્ષથી શાળાએ જવાનું પણ બંધ કરી દીધું હતું. તેઓ દિવસભર એક જ રૂમમાં પુરાઈ રહેતી અને ઘણીવાર કહેતી કે અમારે ‘કોરિયા’ જવું છે.

સુસાઈડ નોટમાં લખ્યું: “સોરી મમ્મી-પપ્પા, અમે ગેમ નથી છોડી શકતા”

પોલીસને તપાસ દરમિયાન ઘટનાસ્થળેથી 18 પાનાની એક ડાયરી (Suicide Note) મળી આવી છે. જેમાં લખ્યું છે કે, “મમ્મી-પપ્પા સોરી, અમે ગેમ છોડી શકતા નથી. જે ગેમ તમે છોડાવવા માંગતા હતા, હવે તમને અહેસાસ થશે કે અમે તેને કેટલો પ્રેમ કરતા હતા.” પિતાએ જ્યારે દીકરીઓને ગેમ રમવા બાબતે ઠપકો આપ્યો, ત્યારે તેઓએ આ આત્મઘાતી પગલું ભર્યું હોવાનું મનાય છે.

એકસાથે રહેતી અને એકસાથે જ મોતને વહાલી કરી

આ કેસમાં સૌથી ચોંકાવનારી બાબત એ છે કે ત્રણેય બહેનો દરેક કામ સાથે કરતી હતી. પોલીસ તપાસ મુજબ, મોટી બહેન પ્રાચી અન્ય બેને ટાસ્ક આપતી હતી. રાત્રે 2:18 વાગ્યે જ્યારે સોસાયટીના ગાર્ડે અવાજ સાંભળ્યો ત્યારે આ ઘટનાની જાણ થઈ. 80 ફૂટની ઊંચાઈએથી પડવાને કારણે ત્રણેયના ઘટનાસ્થળે જ કરૂણ મોત નિપજ્યા હતા.