અબજોપતિમાંથી કંગાળ… હવે જશે જેલ, બાયજુસના સ્થાપક રવીન્દ્રનને મોટો ઝટકો

Byju Raveendran Jail | ભારતના એડટેક (EdTech) સેક્ટરમાં ઓનલાઈન ક્રાંતિ લાવનારી જાણીતી કંપની બાયજુસ (Byju’s)ના સ્થાપક બાયજુ રવીન્દ્રન (Byju Raveendran)ની મુશ્કેલીઓમાં ધરખમ વધારો થયો છે.

બ્લૂમબર્ગ (Bloomberg) ના અહેવાલ મુજબ, સિંગાપોર (Singapore)ની એક અદાલતે અદાલતી અવમાનના (Contempt of Court) ના આરોપસર રવીન્દ્રનને 6 મહિનાની જેલની સજા સંભળાવી છે.

અદાલતે અવલોકન કર્યું કે રવીન્દ્રને પોતાની સંપત્તિ સંબંધિત અગાઉના અનેક આદેશોનું ઉલ્લંઘન કર્યું હતું, જે પ્રક્રિયા એપ્રિલ 2024 થી સતત ચાલી રહી હતી.

કોર્ટે તેમને સત્તાવાળાઓ સમક્ષ આત્મસમર્પણ (Surrender) કરવા, 90000 સિંગાપોર ડોલર (આશરે 70,500 USD ડોલર)નો દંડ ચૂકવવા અને બીયર ઇન્વેસ્ટકો પ્રાઇવેટ લિમિટેડ (Byear Investco Pvt Ltd) નામની કોર્પોરેટ યુનિટમાં પોતાની કાનૂની માલિકી સાબિત કરતા દસ્તાવેજો રજૂ કરવા આદેશ આપ્યો છે.

આ સમગ્ર વિવાદની વાત કરીએ તો, સિંગાપોરમાં આ કેસ કતાર ઇન્વેસ્ટમેન્ટ ઓથોરિટી (Qatar Investment Authority) ની એક પેટા કંપની દ્વારા દાખલ કરવામાં આવ્યો હતો. આ વિદેશી રોકાણકારે બાયજુસમાં એક ફંડિંગ રાઉન્ડ (Funding Round) દરમિયાન મોટું રોકાણ કર્યું હતું.

હવે વૈશ્વિક રોકાણકારો પોતાના નાણાં પરત માંગી રહ્યા છે. આ સિવાય અમેરિકા (USA) સહિત અન્ય ઘણા દેશોમાં પણ રવીન્દ્રન સામે કાનૂની કેસ નોંધાયેલા છે, જ્યાં બેંકો 1.2 અબજ ડોલરની લોન (Loan) ના નુકસાનની વસૂલાત માટે સંઘર્ષ કરી રહી છે.

બીજી તરફ, આ ચુકાદા અંગે સોશિયલ મીડિયા પ્લેટફોર્મ એક્સ (X) પર પ્રતિક્રિયા આપતા બાયજુ રવીન્દ્રને જણાવ્યું કે, આ મામલાને ખોટી રીતે સમજવામાં આવ્યો છે અને આ માત્ર લેણદારો સાથે ચાલી રહેલી સમજૂતી વાટાઘાટો (Settlement Talks) નો એક ભાગ છે.

તેમણે સ્પષ્ટતા કરી કે અદાલતનો આ નિર્ણય કોઈ છેતરપિંડી (Fraud) કે નાણાકીય ગેરરીતિ અંગેનો નથી, પરંતુ માત્ર દસ્તાવેજો રજૂ કરવા સંબંધિત પ્રક્રિયાગત અવમાનનાનો મામલો છે. એક સમયે ભારતની સ્ટાર્ટઅપ (Startup) ઇકોસિસ્ટમમાં અબજોપતિ (Billionaire) બનેલા રવીન્દ્રન માટે આ ચુકાદો એક બહુ મોટો વળાંક સાબિત થયો છે.