AI ઝડપથી આગળ વધી રહી છે, પરંતુ મોટાભાગના અર્થશાસ્ત્રીઓનું માનવું છે નોકરીઓનું સર્જન નહીં કરે

આર્ટિફિશિયલ ઇન્ટેલિજન્સ (AI) ટેક્નોલોજી આજે વૈશ્વિક સ્તરે અત્યંત ઝડપથી વિકાસ પામી રહી છે અને જીવનના દરેક ક્ષેત્રમાં પોતાની પકડ મજબૂત કરી રહી છે. પરંતુ વર્લ્ડ ઇકોનોમિક ફોરમ (WEF) ના તાજેતરના રિપોર્ટે રોજગાર ક્ષેત્રે એક મોટો અને ચિંતાજનક દાવો કર્યો છે.

આ નવા રિપોર્ટ અનુસાર, મોટાભાગના અર્થશાસ્ત્રીઓનું માનવું છે કે AI ની આ ઝડપી પ્રગતિ ભવિષ્યમાં મોટા પ્રમાણમાં નવી નોકરીઓનું સર્જન નહીં કરી શકે, જેના કારણે વૈશ્વિક શ્રમ બજાર પર ગંભીર અસર પડી શકે છે.

વર્લ્ડ ઇકોનોમિક ફોરમ દ્વારા જારી કરાયેલા ‘ચીફ ઇકોનોમિસ્ટ્સ આઉટલુક’માં જણાવવામાં આવ્યું છે કે સર્વેમાં સામેલ 56% અર્થશાસ્ત્રીઓ એવું માને છે કે આગામી વર્ષોમાં વૈશ્વિક અર્થવ્યવસ્થા સ્થિર રહેશે અથવા તેમાં થોડો સુધારો થશે.

જોકે, આ આર્થિક સ્થિરતા કે વિકાસની સાથે નવું રોજગાર સર્જન થવાની સંભાવના ખૂબ જ ઓછી છે.

અગાઉ એવી આશા વ્યક્ત કરવામાં આવતી હતી કે નવી ટેક્નોલોજી હંમેશાં જૂની નોકરીઓની જગ્યાએ નવી અને વધુ સારી રોજગારીની તકો ઊભી કરે છે, પરંતુ AI ના કિસ્સામાં આ ધારણા ખોટી સાબિત થઈ રહી છે.

ટેક્નોલોજી ક્ષેત્રના નિષ્ણાતો અને અર્થશાસ્ત્રીઓના મતે, AI માત્ર સામાન્ય કે ડેટા એન્ટ્રી જેવા કાર્યો જ નહીં, પરંતુ જટિલ પ્રોગ્રામિંગ, કન્ટેન્ટ રાઇટિંગ, ગ્રાફિક ડિઝાઇનિંગ અને ગ્રાહક સેવા જેવા ક્ષેત્રોમાં પણ માનવીય શ્રમની જરૂરિયાત ઘટાડી રહી છે.

કંપનીઓ ખર્ચ ઘટાડવા અને કાર્યક્ષમતા વધારવા માટે ઓટોમેશન અને આર્ટિફિશિયલ ઇન્ટેલિજન્સનો મોટા પાયે ઉપયોગ કરી રહી છે. આ કારણોસર, જે ક્ષેત્રોમાં અગાઉ સુરક્ષિત નોકરીઓ ગણવામાં આવતી હતી, ત્યાં પણ કર્મચારીઓની છટણીનું જોખમ સતત વધી રહ્યું છે.

વૈશ્વિક સ્તરે અનેક દેશોમાં કરવામાં આવેલા સર્વે દર્શાવે છે કે યુવાનો અને શ્રમિક વર્ગમાં AI ને લઈને ચિંતાનો માહોલ જોવા મળી રહ્યો છે.

લોકો માને છે કે AI ના કારણે રોજગારીની તકો ઘટશે અને અમીર તથા ગરીબ વચ્ચેની ખાઈ વધુ પહોળી બનશે.

WEF ના આ અહેવાલે દુનિયાભરની સરકારો અને નીતિ ઘડનારાઓ સામે એક મોટો પડકાર ખડો કર્યો છે.

નિષ્ણાતોનું માનવું છે કે જો સમયસર યોગ્ય નિયમો અને સુરક્ષા કવચ ઊભા કરવામાં નહીં આવે, તો આગામી સમયમાં આર્થિક અસમાનતા અને બેરોજગારીનું સંકટ વધુ ગંભીર રૂપ ધારણ કરી શકે છે.