અમેરિકામાં બળાત્કારના ગુનામાં જેલમાં બંધ ભારતીય મૂળના ટેક્સી ડ્રાઈવરનું નાગરિકત્વ રદ

US Citizenship Revoked | અમેરિકાના (United States) ન્યૂ યોર્ક (New York) શહેરના એક ભારતીય મૂળના ટેક્સી ડ્રાઈવર (Taxi Driver) ગુરમીત સિંહ (Gurmeet Singh) નું US નાગરિકત્વ (Citizenship) રદ કરવામાં આવ્યું છે.

સગર્ભા મહિલા પર બળાત્કાર (Rape) અને અપહરણ (Kidnapping) ના ગુના બદલ 20 વર્ષની જેલની સજા કાપી રહેલા 55 વર્ષીય ગુરમીત સિંહની નાગરિકતા રદ કરવાનો આદેશ યુએસ ડિસ્ટ્રિક્ટ કોર્ટ (US District Court) દ્વારા આપવામાં આવ્યો છે.

મળતી માહિતી મુજબ, ગુરમીત સિંહ વર્ષ 1992માં વિઝિટર વિઝા (Visitor Visa) પર 6 મહિના માટે અમેરિકા ગયો હતો, પરંતુ તે વિઝાની મુદત પૂરી થયા પછી પણ ત્યાં ગેરકાયદેસર રીતે રહેવા લાગ્યો હતો.

બાદમાં વર્ષ 2000માં ફેમિલી-બેઝ્ડ વિઝા (Family-Based Visa)ના આધારે તેને પરમેનન્ટ રેસિડન્ટ (Permanent Resident) એટલે કે ગ્રીન કાર્ડ (Green Card) મળ્યું હતું.

મે 2011 માં, ગુરમીત સિંહે પોતાના નાગરિકત્વ માટેની અરજી કરી તેના થોડા સમય પહેલા જ તેણે આ ભયાનક ગુનો આચર્યો હતો. તે સમયે ટેક્સી ચલાવતા ગુરમીત સિંહે તેની ટેક્સીમાં બેઠેલી એક મહિલા મુસાફરનું અપહરણ કર્યું હતું.

મહિલા ઊંઘી ગઈ ત્યારે તેણે છરીની અણીએ (Knifepoint) તેને બંધક બનાવી, આંખે પાટા બાંધીને તેની સાથે બળાત્કાર ગુજાર્યો હતો.

આ ગુનો કર્યા બાદ પણ ગુરમીત સિંહે ઈમિગ્રેશન ઓથોરિટી (Immigration Authority) પાસે આ ગુનાહિત માહિતી છુપાવી રાખી હતી અને ઓક્ટોબર 2011 માં અમેરિકાનું નાગરિકત્વ મેળવી લીધું હતું.

ત્યારબાદ વર્ષ 2014 માં આ કેસની સુનાવણી દરમિયાન ન્યૂ યોર્કની કોર્ટે તેને ફર્સ્ટ ડિગ્રી રેપ (First Degree Rape) અને સેકન્ડ ડિગ્રી કિડનેપિંગ (Second Degree Kidnapping) માં દોષિત ઠેરવી 20 વર્ષની જેલની સજા ફટકારી હતી.

અમેરિકાના ડિપાર્ટમેન્ટ ઓફ જસ્ટિસ (Department of Justice) એ સ્પષ્ટ કર્યું છે કે ખોટા દસ્તાવેજો અથવા માહિતી છુપાવીને મેળવેલું નાગરિકત્વ ક્યારેય કાયદેસર ગણાતું નથી.

એટોર્ની જનરલ (Attorney General) ટોડ બ્લેન્ચે (Todd Blanche) જણાવ્યું હતું કે, “ગુરમીત સિંહે નાગરિકતા પ્રક્રિયા દરમિયાન પોતાના ગુનાહિત ભૂતકાળને છુપાવ્યો હતો, જેના કારણે ફેડરલ કોર્ટે (Federal Court) તેનું નાગરિકત્વ રદ (Revoke) કરી દીધું છે. તે હવે અમેરિકન નાગરિક નથી.”

તપાસ એજન્સીઓના જણાવ્યા અનુસાર, સજા પૂર્ણ થયા બાદ ગુરમીત સિંહને ભારત ડિપોર્ટ (Deport) કરવામાં આવે તેવી પણ શક્યતા છે. યુએસ જસ્ટિસ ડિપાર્ટમેન્ટે આ નિર્ણય દ્વારા સ્પષ્ટ સંદેશ આપ્યો છે કે ધાકધમકી કે છેતરપિંડી દ્વારા મેળવેલી નાગરિકતા ગુનેગારોને ન્યાયથી બચાવી શકશે નહીં.