લગ્નના ગણતરીના કલાકોમાં જ ભારતીય મૂળના પાયલટનું અમેરિકામાં હેલિકોપ્ટર ક્રેશમાં મોત, દુલ્હનનો આબાદ બચાવ

Helicopter Crash | અમેરિકાના (America) જ્યોર્જિયામાં (Georgia) એક અત્યંત હૃદયદ્રાવક ઘટના સામે આવી છે, જ્યાં લગ્નની ખુશીઓ ગણતરીના કલાકોમાં જ માતમના માહોલમાં ફેરવાઈ ગઈ હતી. પોતાના લગ્નનું ભવ્ય સેલિબ્રેશન (celebration) પૂરું કરીને પરત ફરી રહેલા એક ભારતીય મૂળના નવદંપતીનું હેલિકોપ્ટર (helicopter) ક્રેશ (crash) થયું હતું.

આ ભયાનક અકસ્માતમાં 25 વર્ષીય ભારતીય મૂળના વરરાજા અને હેલિકોપ્ટરના પાયલટનું કરુણ મોત નીપજ્યું છે, જ્યારે નવવધૂ આ દુર્ઘટનામાં ચમત્કારિક રીતે બચી ગઈ છે અને હાલ હોસ્પિટલમાં સારવાર હેઠળ છે.

યુએસ મીડિયા રિપોર્ટ્સ (US media reports) અનુસાર, મૃતક યુવકની ઓળખ ડેવ ફિજી (Dave Fiji) તરીકે થઈ છે, જે એટલાન્ટાનો (Atlanta) રહેવાસી હતો અને ડેલ્ટા એરલાઇન્સમાં (Delta Air Lines) કોમર્શિયલ પાયલટ (commercial pilot) તરીકે ફરજ બજાવતો હતો.

શુક્રવારે રાત્રે જ્યોર્જિયાના ડોસન કાઉન્ટીમાં (Dawson County) ડોસનવિલે નજીક 5 સીટર ધરાવતું રોબિન્સન (Robinson) હેલિકોપ્ટર તૂટી પડતાં આ અકસ્માત સર્જાયો હતો. આ દુર્ઘટનામાં ડેવની પત્ની જેસ્ની (Jessni) ગંભીર રીતે ઘાયલ થઈ હતી, જેને તાત્કાલિક નજીકની હોસ્પિટલમાં ખસેડવામાં આવી હતી.

ડેવ અને જેસ્નીના લગ્ન એ જ દિવસે ડોસનવિલે નજીક આવેલા ‘ધ રેવરે’ (The Revere) નામના વેડિંગ વેન્યુ પર થયા હતા. આ લગ્ન સમારોહમાં બંને પરિવારોના સેંકડો મહેમાનોએ હાજરી આપી હતી.

ડેવના માતા-પિતા વર્ષો પહેલા કેરળના (Kerala) એરનાકુલમથી અમેરિકા સ્થળાંતરિત થયા હતા, જ્યારે જેસ્નીનો પરિવાર પણ કેરળના આલપ્પુઝા જિલ્લા સાથે સંબંધ ધરાવે છે. ડેવના પિતા જોર્જ ફિજીએ ભારે હૈયે જણાવ્યું કે, તે અમારું ખૂબ જ સુંદર અને વહાલું બાળક હતું. લગ્ન ખૂબ જ પરફેક્ટ (perfect) રહ્યા હતા, પરંતુ તે પછી બધું જ બરબાદ થઈ ગયું.

લગ્ન બાદ આ નવદંપતી હેલિકોપ્ટર દ્વારા પીચટ્રી-ડીકાલ્બ એરપોર્ટ (Peachtree-DeKalb Airport) જવા અને ત્યાંથી એટલાન્ટાની એક હોટેલમાં રાત્રિ રોકાણ કરવા રવાના થવાનું હતું. જો કે, રાત્રે 9:30 વાગ્યાની આસપાસ વાતાવરણ ખૂબ જ ખરાબ થઈ ગયું હતું. ભારે વરસાદ અને ધુમ્મસના (fog and rain) કારણે વિઝિબિલિટી (visibility) ઘટી ગઈ હતી.

ડેવ પોતે એક અનુભવી પાયલટ હોવાથી તેણે આ ખરાબ વાતાવરણમાં ઉડાન ભરવાની ના પાડી હતી. પરંતુ, હેલિકોપ્ટરના મુખ્ય પાયલટે ઉચ્ચ અલ્ટીટ્યુડ (higher altitude) પર ઉડાન ભરવાનો નિર્ણય કર્યો અને હેલિકોપ્ટર ટેક-ઓફ (take-off) થયું.

ઉડાન ભર્યાના થોડા જ સમયમાં રાત્રે અંદાજે 10:30 વાગ્યે રોબિન્સન R66 (Robinson R66) હેલિકોપ્ટર ડોસનવિલેના એક ગાઢ અને પહાડી જંગલ વિસ્તારમાં ક્રેશ થઈ ગયું. અકસ્માત એટલો ભયાનક હતો કે જેસ્ની કાટમાળ અને ધરાશાયી થયેલા વૃક્ષો નીચે લગભગ 5 કલાક સુધી ફસાયેલી રહી હતી.

જ્યારે તેને હોશ આવ્યો ત્યારે તેનો પતિ ડેવ તેના પર મૃત હાલતમાં પડ્યો હતો. રેસ્ક્યુ ટીમને (rescue team) અત્યંત દુર્ગમ વિસ્તાર હોવાના કારણે ઘટનાસ્થળે પહોંચવામાં 6 કલાક જેટલો સમય લાગ્યો હતો. ફેડરલ એવિએશન એડમિનિસ્ટ્રેશન (FAA) અને નેશનલ ટ્રાન્સપોર્ટેશન સેફ્ટી બોર્ડ (NTSB) દ્વારા આ સમગ્ર અકસ્માતની તપાસ શરૂ કરવામાં આવી છે.