કોંગ્રેસમેન શ્રી થાનેદારે બ્રાન્ડન ગિલની ‘7-Eleven વર્કર્સ’ વાળી ટિપ્પણી પર કહ્યા વંશીયવાદી; જાણો વિવાદ

Shri Thanedar Brandon Gill | અમેરિકાના ભારતીય મૂળના ડેમોક્રેટિક કોંગ્રેસમેન શ્રી થાનેદારે (Shri Thanedar) સાથી કાયદા ઘડનાર રિપબ્લિકન બ્રાન્ડન ગિલ (Brandon Gill) પર આકરા પ્રહારો કર્યા છે.

થાનેદારે જણાવ્યું હતું કે, ટેક્સાસ (Texas) ના રિપબ્લિકન નેતા બ્રાન્ડન ગિલ (Brandon Gill) દ્વારા ભારતીય-અમેરિકનો (Indian Americans) માટે ‘7-Eleven વર્કર્સ’ (7-Eleven workers) શબ્દનો પ્રયોગ એ મુખ્ય કારણ છે કે લોકો તેમને વંશીયવાદી (Racist) માને છે.

ગિલનો એવો દાવો તદ્દન ખોટો છે કે રાજકીય વિરોધીઓ તેમનો અવાજ દબાવવા માટે તેમના પર આવા આરોપો લગાવી રહ્યા છે.

આ સમગ્ર વિવાદ સોશિયલ મીડિયા પ્લેટફોર્મ X (ટ્વિટર) પર શરૂ થયો હતો. બ્રાન્ડન ગિલે એક પોસ્ટમાં લખ્યું હતું કે, વંશીયવાદના આરોપો હવે કન્ઝર્વેટિવ્સ (Conservatives) ને ડરાવી શકતા નથી. તેમણે એક ગ્રાફિક શેર કર્યું હતું જેમાં લખ્યું હતું, “ડાબેરીઓ પાસે ચર્ચાની એક જ રણનીતિ છે: તમને વંશીયવાદી કહો અને પ્રાર્થના કરો કે તમે ચૂપ થઈ જાઓ. હું ક્યારેય ચૂપ નહીં થાઉં.”

મિશિગન (Michigan) ના ભારતીય-અમેરિકન કોંગ્રેસમેન શ્રી થાનેદારે આ પોસ્ટનો જડબાતોડ જવાબ આપ્યો હતો. થાનેદારે ગિલની જૂની ઇમિગ્રેશન (Immigration) સંબંધિત પોસ્ટ તરફ ઈશારો કર્યો, જેમાં ગિલે લખ્યું હતું, “આપણને ભારત (India) કે દુનિયાના કોઈ પણ ખૂણેથી ‘7-Eleven વર્કર્સ’ આયાત કરવાની જરૂર નથી. અમેરિકનોને નોકરી પર રાખો.”

થાનેદારે વળતો પ્રહાર કરતા લખ્યું, “તમને ડરાવીને ચૂપ કરવા માટે કોઈ વંશીયવાદી નથી કહી રહ્યું. અમે તમને વંશીયવાદી એટલા માટે કહીએ છીએ કારણ કે તમે ભારતીય-અમેરિકનોને ‘7-Eleven વર્કર્સ’ તરીકે સંબોધિત કરો છો.”

તેમણે વધુમાં ઉમેર્યું કે, ગિલ પોતે એક ભારતીય-અમેરિકન મહિલા સાથે પરિણિત હોવા છતાં, રાજકીય ફાયદા માટે વંશીયવાદી આધાર ધરાવતા લોકો સમક્ષ આવી ટિપ્પણીઓ કરી રહ્યા છે. થાનેદારે તેને અત્યંત દયનીય ગણાવ્યું હતું.

ગિલની આ ટિપ્પણીની ભારતીય-અમેરિકન સમુદાય અને ઇમિગ્રન્ટ્સ (Immigrants) ના સમર્થકો દ્વારા ભારે આલોચના કરવામાં આવી છે, કારણ કે આ ટિપ્પણી ભારતીયોને કન્વીનિયન્સ સ્ટોર (Convenience store) ની નોકરીઓ સાથે જોડતી એક જૂની રૂઢિચુસ્ત માનસિકતા (Stereotype) દર્શાવે છે.

ટીકાકારોનું કહેવું છે કે આવી ટિપ્પણીઓ મેડિસિન (Medicine), એન્જિનિયરિંગ (Engineering), ટેકનોલોજી (Technology), અને પબ્લિક સર્વિસ (Public service) જેવા ક્ષેત્રોમાં ભારતીય ઇમિગ્રન્ટ્સના યોગદાનને ઓછું આંકીને જોવાનો પ્રયાસ છે.

બીજી તરફ, ગિલના સમર્થકોનો દાવો છે કે તેમનો હેતુ કોઈ ચોક્કસ વંશીય જૂથને નિશાન બનાવવાનો નહોતો, પરંતુ અમેરિકન કામદારોને પ્રાથમિકતા આપવાનો હતો.

આ અગાઉ પણ ગિલ ઇમિગ્રેશન અને સાંસ્કૃતિક ઓળખ અંગે વિવાદોમાં રહ્યા છે. થોડા સમય પહેલાં, ન્યૂયોર્ક સિટી (New York City) ના મેયર પદના ઉમેદવાર ઝોહરાન મામદાની (Zohran Mamdani) ના હાથથી જમવાના વીડિયો પર ગિલે ટિપ્પણી કરી હતી કે, “અમેરિકાના સભ્ય લોકો આ રીતે નથી ખાતા. જો પશ્ચિમી સંસ્કૃતિ ન અપનાવવી હોય, તો થર્ડ વર્લ્ડ (Third World) માં પાછા જાઓ.” આ ટિપ્પણીની પણ વ્યાપક ટીકા થઈ હતી.